في خاطري اجلس بحدك وامازحك

تغيب لكن فـي عيونـي ملامحـك
ماغبت عن ناظـر عيونـي دقيقـه
تجفى وانا من طيبتي جيت اصالحـك
ياقو قلبـك كيـف يجفـى عشيقـه
كم مـرةٍ تغلـط عليـه واسامحـك
هجـرك وتعذيبـك وربـي مطيقـه
هذا أنا بالمختصر جيـت اصارحـك
وأكشف لك إحساسي بنبض الحقيقه
في خاطري اجلس بحدك وامازحـك
وأحب ثغرك وارتشف مـن رحيقـه
واغوص في لذة غرامـك واكابحـك
دام الأمـل فاتـح لقلبـي طريقـه
شفت الهواء في بحر عينيك فاضحك
وأنته تحاول صوب وصلـي تعيقـه
قلبك من اسبابه على الجرف طارحك
وانـا مـع قلبـك حياتـي غريقـه
قوم انتشلني قبـل عينـي تبارحـك
يكفيـك حرمـان اليـال العتيـقـه
أنا اعلم إن الشوق فالقلـب ذابحـك
وان المشاعر فـي فـؤادك رقيقـه
واني بليـا شـك بالحـب رابحـك
لكن عنـادك خمرتـه مـا تفيقـه
إلى متى يـدي بوصلـك تصافحـك
وتصون حب اللـي بقلبـي لصيقـه
لو ادري إني يوم يا شوق جارحـك
مازدت تعذيـب النفـوس الشفيقـه
لكن فكـري دوم يرعـي مطامحـك
وانتي مع هاجوس فكـرك طليقـه